Igrexa de Outeiro Cruz

A maiores, engadimos a descrición aportada por Óscar Franco: Edificio fundado no ano 1612, data que aparece gravada na fachada. De nave rectangular máis presbiterio, muros portantes de perpiaños de granito con contrafortes e cuberta a dúas augas. A sancristía, anexa ao muro sur é un engadido posterior. No alzado exterior destaca a fachada, tamén de cantería, que presenta traza pentagonal. No eixo vertical superpóñense a portada inscrita nun arco de medio punto moldurado, unha ventá de feitura románica (ao parecer procedente da capela que existía anterior­mente no mesmo lugar),de medio punto co arco axadrezado, e enriba a imaxe do patrón do templo. Coroa a fachada unha espadana de dous corpos que nace dunha cornixa de ornamentación denticulada, con tres machóns e dous arcos alintelados onde se aloxan as campás, enmarcadas por unha decoración axadrezada semicircular. Remata a espadana un pequeno corpo superior cun arco de medio punto, con cornixa moldurada.