Castro de Imo – Castro

Señor HISTDODRO:
Está claro que “Ese camiño asfaltado forma parte do ordenamento da Concentración Parcelaria, que por estas terras se fixo a finais dos anos 80. E foi nese momento cando se creou e asfaltou o citado camiño.” como vostede di, pero iso non da validez á actuación do goberno de Dodro para “reasfaltar” e volver a cometer o mesmo erro dos anos 80, pero agora con ampliación da sección, acometida de tubaxes e volver a destruír parte da pouca estrutura do castro que quedaba. Se vostede mirara o expediente da obra (o que ten no andel ó lado da súa mesa) xa vería o que di Consellería de Cultura: “informándose desfavorablemente á ampliación da sección do camiño proposta” e un pouco mais adiante no mesmo documento di con respecto ás obras: “agás as obras de ampliación do camiño entre Castro e Teaio onde as actuacións limitaranse á limpeza e mantemento do camiño”. “O concello de Dodro o único que fixo foi arranxar o camiño, como lle pediron os veciños da Aldea de Castro” Non é verdade ningunha das afirmacións. Non foi un arranxo, foi unha ampliación e unha destrución de un ben patrimonial e os veciños protestaron pola obra poñendo indicadores. E non solo foi que o fixo sen “sen facer os trámites pertinentes” senón que o fixo con PROHIBICIÓN EXPRESA por parte da consellería.
Se vostede mirara noutro andel ó lado da súa mesa, vería un expediente que abriu a Consellería de Cultura e nun dos apartados está o informe que di “persoal especialista en arqueoloxía visitou o lugar dos feitos e remite informe de “as obras incumpren as condicións nas que se outorgou a autorización administrativa””
Que razón ten cando di: “Antes de falar hai que informarse ben.” pois fágao, que vostede ten a información toda ó seu carón.

Unidade Veciñal de Dodro.

“Debaixo dos pes de cada xeración que pasa na terra, dormen as cinzas de moitas xeracións que a precederon.”
Alexandre Herculano